В неділеньку ясне сонце сходит,
Ластівочка виходит;
Посмот, дівча, по місті Лемберку
Юж ся Янчик проходит.

Проходит ся по місті Лемберку,
Аж му шабля сталює,
Посмот, дівча, по місті Лемберку
Юж ся Янчик шнурує.

Шнурує ся єдвабном хустечком,
Аж му силзи падают;
Посмот, дівча, по місті Лемберку,
Юж му мундур давают.

Давают му цілий мундур його
І коника враного,
Посмот, дівча, по місті Лемберку,
Юж він сідат на нього.

А як він сів на враного коня,
Три раз він ся обруцив,
Посмот, дівча, по місті Лемберку,
Юж ся з тобом розлучив.

Розлучив ся на дві, на три слова,
І на єдно знаменя,
Посмот, дівча, по місті Лемберку,
Будеш моя, або нє.