Weseła s'witu nowyna:
Bo Diwa powyła Syna!
Z neba anhelskiji hłasy
Sławljat' Boha po wsi czasy:
"S'wjat, s'wjat, s'wjat Hospod'!" wzywajut',
Tworcja s'wita wełyczajut'.
Pastyrije że ubohi
Sławljat' Boha – a nimiji
Bydljata nyc' na kolina
Padut' z nymy wsja z'wiryna.

Josyf sja dnes' raduje,
Na rukach Boha pistuje,
I Diwa sja utiszaje,
Poklin jemu swij widdajut'.
Sinom Chrysta pokrywaje.
Wił i oseł ohriwajut',
Sino krassze jak łelija,
Bo na nim Diwa Marija
Wsemu s'witu porodyła,
Myr z newoli swobodyła.

Wezut' dary monarchowe;
Pytajut': De czudo nowe?
De dytyna spoczywaje?
Z'wizdu Jeho kożdyj znaje!
Z'wizda taja aż wid schodu
Wede cariw ko Hospodu...
O czudesne Boha diło!
Pryjmy myro i kadyło
W ruczky, Chryste, pryjmy złato,
A nas błahosłowy za to.

Irod łjutyj toje czuje,
Zasud daje, dekretuje:
Naj Dytyna czołowicza
Zhyne wid ostroho mecza,
Bo sja maje narodyty,
Szczo bez kincja maje żyty.
Wid hrudyj dity stynaje,
Żadnomu ne probaczaje,
Matery hirko rydajut',
Na smert' dityj pohljadajut'.

Wyfłejeme, Ty nehodnyj,
Oto Syn jedynorodnyj
Do Jehypta utikaje,
Maty k sobi prytuljaje,
Starec' osła pidhanjaje,
Anheł peresterihaje.
O Irode, łjutyj pane,
Po twojemu sja ne stane,
Bo Chrystos, Car wseho s'wita,
Bude żyty po wsi lita!

Sławim Boha bezsmertnoho,
Szczo rodywsja nam uboho,
I matir Jeho s'wjatuju,
Mariju, Diwu czystuju:
Szczo na s'wit Carja wydała,
Naj bude jij czest' i chwała!
Tobi prynosym pisń szczyru:
Błahosłowy wsemu myru,
I nam hrisznym, szczo spiwajem,
Naj tja w wiky wełyczajem.